Friday, July 3, 2009
இனி சினிமாவில் நடிக்க மாட்டேன் - சிரஞ்சீவி
"ஒருவர் இரண்டு குதிரைகள் மீது சவாரி செய்ய முடியாது. அதே போலத்தான் நானும் இரு தொழில்களில் கவனம் செலுத்த விரும்பவில்லை. அரசியல்தான் இனி என் முழு நேரப் பணி. சினிமாவில் இனி நடிக்க மாட்டேன்" என பிரஜா ராஜ்யம் கட்சித் தலைவர் சிரஞ்சீவி தெரிவித்தார்.
ஹைதராபாத் கட்சி அலுவலகத்தில் நிருபர்களிடம் சிரஞ்சீவி கூறியதாவது:
சினிமா துறை என் பிறந்த வீடு; அரசியல் புகுந்த வீடு. பிறந்த வீடு எவ்வளவு சிறப்பாக இருந்தாலும் புகுந்த வீட்டுக்கு சென்ற பின்னால் கணவரை பிரிந்து, பிறந்த வீட்டிற்கு போக முடியாதல்லவா? அதுபோலத்தான் நான் அரசியலுக்கு வந்ததில் தவறேதுமில்லை.
தற்போது என் எண்ணமெல்லாம் கட்சியை முழு அளவில் பலப்படுத்தி ஆட்சியைப் பிடித்து மக்களுக்கு பணி செய்வதில்தான் உள்ளது. மீண்டும் சினிமாவில் நடிக்கச் செல்வது தர்மமான செயல் இல்லை.
சமீபத்தில் ஆடியோ நிகழ்ச்சி ஒன்றில் கலந்து கொண்டேன். அப்போது மேலும் ஒரு சினிமாவில் நடித்தால் நன்றாக இருக்கும் என, வாய் தவறி கூறி விட்டேன். ஆனால், எதிர்காலத்தில் நிலைமை எப்படி இருக்குமோ சொல்ல முடியாது. என் உண்மையான நோக்கம், மனநிலை எல்லாமே இப்போது அரசியல்தான்.
கடந்த தேர்தலில் 'ரயில் இன்ஜின்' சின்னத்தால் ஏற்பட்ட குளறுபடியால் கட்சிக்கு தோல்வி ஏற்பட்டது. தேர்தல் கமிஷனரிடம் புதிய சின்னம் கேட்க நான்கு சின்னங்கள் தேர்வு செய்யப்பட்டு பரிந்துரைக்கப்பட்டுள்ளன.
உதயசூரியன், குடை சின்னங்களை கேட்டு தலைமை தேர்தல் கமிஷனருக்கு கடிதம் எழுதி உள்ளோம். கட்சியினர் அனைவரும் உதயசூரியன் சின்னத்தை விரும்புகின்றனர்," என்றார்.
Thursday, July 2, 2009
ரஜினியின் சூரிய பார்வை
படத்தயாரிப்பில் புதிய வியூகங்களுடன் களமிறங்கியிருக்கிறது சன் நெட்வொர்க். இவர்களின் சன் பிக்சர்ஸ் விநியோகிக்கும் திரைப்படங்கள் - அவை எவ்வளவு மோசமாக இருந்தாலும் ஹவுஸ்ஃபுல்லாக ஓட வைக்கும் விளம்பர சூட்சுமம் சன் குழுமத்துக்கு கை வந்திருக்கிறது.
எந்திரன் படத்தை தயாரிப்பதன் மூலம் தமிழ் திரைத்துறையின் மிகப் பெரிய தயாரிப்பு நிறுவனமாக தன்னை நிலைப்படுத்தியிருக்கிறது சன் பிக்சர்ஸ். எந்திரனைப் போல மேலும் சில மெகா ப்ராஜெக்ட்களை தயாரிக்கும் திட்டமும் சன் பிக்சர்சுக்கு இருக்கிறது.
அதேபோல் சன்னின் பிரமாண்டமும், அவர்களின் விளம்பர யுக்தியும், திட்டமிடலும் ரஜினியையும் கவர்ந்திருக்கிறது. சன் பிக்சர்ஸின் மேலும் சில ப்ராஜெக்ட்களில் இணைந்து பணிபுரிய ரஜினி ஆர்வமாக இருப்பதாக தகவல்கள் தெரிவிக்கின்றன.
ஹாலிவுட்டைப் போல பிரமாண்ட சம்பளத்துக்கு ரஜினி சன் பிக்சர்சுடன் ஒப்பந்தம் போடுவார் என்பது அவருக்கு நெருக்கமானவர்கள் கசியவிடும் தகவல். எந்திரன் முடிவதற்குள் இந்த அறிவிப்பை ரசிகர்கள் எதிர்பார்க்கலாம் என்றும் அவர்கள் தெரிவிக்கிறார்கள்.
Saturday, June 27, 2009
விக்ரம் நடிக்கும் படத்தில் ஏ.ஆர்.ரஹ்மான்
விக்ரம் நடிக்கும் அடுத்தடுத்த இரு படங்களுக்கு இசைப்புயல் ஏ.ஆர்.ரஹ்மான் இசையமைக்கிறார். எந்த ஒரு நடிகருக்கும் அரிதாக அமையும் வாய்ப்பு இது.
ஆஸ்கர் அளவுக்கு உயர்ந்தாலும் நேரம் ஒதுக்கி தமிழ்ப் படங்களுக்கு இசையமைக்கிறார் ஏ.ஆர்.ரஹ்மான். மணிரத்னத்தின் ராவண், ஷங்கரின் எந்திரன், கவுதமின் விண்ணைத்தாண்டி வருவாயா, சென்னையில் ஒரு மழைக்காலம் என்று நீள்கிறது ரஹ்மான் இசையமைக்கும் படங்களின் பட்டியல்.
ராவண் படத்தின் இந்தி மற்றும் தமிழ் பதிப்புகளில் விக்ரம் நடித்து வருவது தெரியும்;. இதனை அடுத்து மோகன் நடராஜன் தயாரிப்பில் கே.எஸ்.ரவிக்குமார் இயக்கும் படத்திற்கு கால்ஷீட் கொடுத்திருக்கிறார்.
ஆதவன் படத்துக்குப் பிறகு விக்ரம் நடிக்கும் படத்தை கே.எஸ்.ரவிக்குமார் இயக்குகிறார். இந்தப் படத்துக்கு இசை ஏ.ஆர்.ரஹ்மான். ஹீரோயின் மற்றும் தொழில்நுட்ப கலைஞர்கள் யார் என்பது இன்னும் முடிவாகவில்லை. படத்துக்கு நல்ல தமிழ்ப் பெயராக தேடிக் கொண்டிருக்கிறார்கள்.
